डेनमार्कका सी पेडरर्सन थोर Torbjørn C. Pedersen -Thor विश्वयात्राका क्रममा विहीबार नेपाल आइ पुगेका छन्। स्थल र जलमार्गको प्रयोगबाट विश्व भ्रमण सकी नयाँ इतिहास बनाउने क्रममा रहेका थाेर १७९ औं मुलुककाे भ्रमण अन्तर्गत नेपाल आइपुगेका हुन्।
डेनिस रेडक्रसको सद्भावना दुतको रुपमा नेपाल रेडक्रसको केन्द्रीय कार्यालयमा कुराकानी गर्दै उनले भने "विश्वमा मानिस र मानवताको खास अर्थ फैलाउने मेरो उद्देश्य छ। विश्वको जुनसुकै कुनामा शुरक्षा, शिक्षा, आवास, भोजनलगायतको समस्या छ र आम रुपले मानिसहरुमा समानता मैले देखेको छु।”
नेपाल भ्रमणको क्रममा उनले विश्व सम्पदा सूचीमा रहेका दरबार क्षेत्रहरुको अवलोकन गर्नुका साथै नेपाल रेडक्रसले सञ्चालन गरेको हटलाईन ११३० कल सेन्टर तथा विपद् व्यवस्थापन आपत्कालीन केन्द्रका साथै नेपालमा डेनिस रेडक्रसले सञ्चालन गरेका कार्यक्रमको अवलोकन गरेको नेपाल रेडक्रसका सञ्चार निर्देशक दिव्यराज पौडेलले जानकारी दिए।
साे अवसरमा उनले राष्ट्रिय रक्त सञ्चार सेवा केन्द्र बालकुमारीमा गई रक्तदान समेत गरेका थिए। “मानिसहरुको नशामा उस्तै प्रकारको रगत बगिरहेको छ र खुशी तथा सन्तुष्टि पाउने एउटा राम्रो तरीका रक्तदान हो।” थोरले रक्तदान गरेपछि भने।
सन् २०१३ बाट सुरुभएको विश्व यात्राका क्रममा अहिलेसम्म थाेरले २ लाख ४३ हजार किलाेमिटर दूरी तय गरिसकेका छन्। दुई सय देशकाे भ्रमण गर्ने लक्ष्य लिएका थाेरले सन् २०२० सम्ममा पुरा गर्ने अनुमान गरिएकाे छ।