सरकारले १५ औं अनसनका क्रममा आफूसँग भएकाे सम्झौताविपरित चिकित्सा तथा स्वास्थ्य समितिले चिकित्सा शिक्षा विधेयक पारित गरेकाे भन्दै डा. गोविन्द केसीले आजबाट १६ औं अनसन शुरू गरेका छन् ।
संसदको उपसमितिले पारित गरेको प्रतिवेदनलाई नेकपाको बहुमतका आधारमा जस्ताको तस्तै पारित गरेपछि डा केसीले इलाममा पुगेर अनसन बसेका हुन्। उनी इलामस्थित शहरी विकास तथा भवन निमाण विभाग डिभिजन कार्यालयमा अनशन बसेका छन् । यस अघि डाक्टर केसी जुम्ला पुगेर अनशन बसेका थिए । चिकित्सा क्षेत्रमा सुधारको माग गर्दै केसी पटकपटक अनशन बस्दै आएका छन् ।
डा केसीले सम्झौतालाई अक्षरशः पारित गर्नुपर्ने माग राख्दै आएका थिए। यसअघि गत पुस १७ गतेदेखि नै सत्याग्रह गर्ने घोषणा गरेका केसीले संसदीय समितिकै आग्रहमा कार्यक्रम एक साता पर सारेका थिए।
त्यतिबेला संसदीय समितिकी सभापति जयपुरी घर्तीले सम्झौताअनुसार नै विधेयक पारित गर्ने आश्वासन दिँदै तत्काल अनशन नथाल्न र धैर्य गर्न डा केसीलाई आग्रह गरेपछि उनी २५ गतेसम्मको अल्टिमेटम दिएर फर्किएका थिए। सोमबार उनले त्रिवि शिक्षण अस्पतालमा पत्रकार सम्मेलन गरेर सम्झौताविपरीत उपसमितिले गरेको निर्णय सच्याउँन समितिसमक्ष आग्रह गरेका थिए।उनले याे अनसन मेडिकल माफियाविरुद्ध मात्र नभई तिनका संरक्षक र दलका नेताविरुद्ध हुने बताए।
केसीका माग
१. १५ औं सत्याग्रहका क्रममा २०७५ साउन १० गते नेपाल सरकारसँग भएको सम्झौता कार्यान्वयन गरियोस् ।
क. सम्झौता बमोजिम अक्षरशः संशोधन गरेर शिक्षा तथा स्वास्थ्य समितिबाट अविलम्ब चिकित्सा शिक्षा बिधेयक पारित गरियोस् ।
ख. गौरीबहादुर कार्की नेतृत्वको जाँचवुझ आयोगको प्रतिवेदनले दोषि ठहर गरेका त्रिवि पदाधिकारीलगायतका व्यक्तिहरुलाई तत्काल सिफारिश बमोजिम बर्खास्ती लगायतका कारवाही गरियोस् । त्रिवि पदाधिकारीहरुद्वारा चिकित्सा शिक्षा अध्ययन संस्थानका खोसिएका अधिकारहरु पुनः सो संस्थान मै फिर्ता गरियोस् ।
ग. सातै प्रदेशमा सरकारी मेडिकल कलेज खोल्ने काम द्रुत गतिमा अघि बढाइयोस् । साथै पूर्वी पहाडका ताप्लेजुंग ,इलाम ,पाँचथर, तेह्रथुम लगायतका जिल्लाका नागरिकलाई उपचारका लागि इलाममा, भोजपुर,ओखल्ढुंगा, खोटांग, सप्तरीलगायतका जिल्ला समेटेर उदयपुरमा, पश्चिमी पहाडका डडेल्धुरा, बैतडी, बझांगलगायतका जिल्ला समेटेर डोटी रडडेल्धुरामा अबिलम्ब मेडिकल कलेज तथा अस्पताल खोलियोस् । कर्णाली स्वास्थ्य विज्ञान प्रतिष्ठानमा अविलम्ब एमबीबीएस भर्ना शुरु गर्ने व्यवस्था गरियोस् ।
२. निर्मला पन्तको बलत्कार र हत्यामा संलग्न व्यक्तिहरुलाई तत्काल पक्राउ गरी मुद्दा चलाइयोस् । साथै, प्रमाण लोप गर्ने, झुठा प्रमाण बनाउने, यातना दिने, न्याय माग्न गएका व्यक्ति माथि गोली चलाई हत्या, अंगभंग गर्ने व्यक्तिहरु माथि तत्काल फौजदारी मुद्दा चलाइयोस् ।
३. नेपाल सरकारको निर्णयको उल्लंघन गरी काठमाडौं विश्वविद्यालयले तोकेको शुल्क तत्काल फिर्ता लिई दोषी पदाधिकारी माथि कारवाही गरियोस् ।