प्रदेश नं ५ को सामाजिक विकास मन्त्रालय अन्तर्गतको स्वास्थ्य निर्देशनालय र शिक्षा महाशाखाले संसदीय समितिले माग गरेका कागजपत्र उपलब्ध नगएको भन्दै ति कागज पत्र बुझाउन तेस्रो पटक निर्देशन दिएको छ ।
आइतबार बसेको समितिको बैठकले स्वास्थ्य निर्देशनालयले खरिद गरेका स्वास्थ्य उपकरण तथा औषधि खरिद सम्बन्धी कागजात माग गरेकोमा सो विवरण हाल सम्म उपलब्ध नगराएको भन्दै पुन ताकेता गर्ने निर्देशन दिने निर्णय गरेको हो । सामाजिक विकास मन्त्रालय अन्तर्गतकै शिक्षा महाशाखासँग आर्थिक वर्ष २०७५/०७६ मा शिक्षा क्षेत्रमा छुट्टाएको वजेट कार्यान्वयको अवस्था बारेको विवरण माग गरेकोमा त्यससँग सम्बन्धी विवरण पनि हाल सम्म उपलब्ध नगराएको भन्दै समितिले त्यस सम्बन्धी कागज पत्र पठाउन पुन ताकेता गर्ने निर्णय भएको समितिका सभापति दृगनारायण पाण्डेयले जानकारी दिए ।
यस अघि साउन २ गते पिहलो पटक निर्देशन दिएकोमा कागजपत्र नपठाएको भन्दै साउन १६ गते ३ दिन भित्र कागजपत्र पठाउन समितिले निर्देशन दिएको थियो । समितिका सभापति दृगनारायण पाण्डेको सभापतित्वमा सम्पन्न बैठकले समितिबाट भएको अस्पत्तालहरुको अनुगमन प्रतिवेदन सम्बन्ध समेत पारित गरेको छ । बैठकमा प्रदेशसभा सदस्यहरु अर्जुन कुमार श्रेष्ठ,बाबुराम गौतम,पुरनमान बज्राचार्य,दिपा बिक,कमला बिक,रिना नेपाल बिक ले अनुगमन प्रतिवेदनका विषयमा आ आफ्नो सुझाव दिएका थिए ।
यसैबीच आइतबारै प्रदेश मामिला तथा कानून समिति र अर्थ,उद्योग तथा पर्यटन समितिका बैठकहरु समेत बसेको प्रदेशसभा सचिवालयले जनाएको छ । प्रदेश मामिला तथा कानून समितिको बैठकमा प्रदेश पदक सम्बन्धमा व्यवस्था गर्न बनेको विधेयकमाथि दफावार छलफल भएको प्रदेशसभा सचिवालयका सूचना अधिकारी मनोज कुमार पाण्डेले जानकारी दिए ।
बैठकमा आन्तरिक मामिला तथा कानून मन्त्री कुलप्रसाद केसीको समेत उपस्थितिमा विधेयकमाथि दफावार छलफल भएको प्रदेशसभा सचिवालयले जनाएको छ ।
त्यसैगरी अर्थ,उद्योग तथा पर्यटन समितिका बैठकमा साझेदारी सम्बन्धमा व्यवस्था गर्न बनेको विधेयक र प्राइभेट फर्म दर्ता गर्ने सम्बन्धमा व्यवस्था गर्न बनेको विधेयक माथि दफावार छलफल भएको छ ।